أولاً، المعجزة يعني حاجة مانقدرش إحنا نعملها وبنشوف أنها مستحيلة، ولكن ربنا يتدخل ويعملها.
ولازم نعرف أن ربنا اللي بيتكلم عليه الكتاب المقدس واللي عمل كل المعجزات دي، هو هو ربنا اللي يقدر يعمل أعمال عجيبة جدًا في كل وقت وكل زمان. الله عظيم جدًا وقوته مالهاش حدود، ويقدر يعمل أي حاجة في الوقت اللي هو عايزه، من غير ما حاجة تمنعه.
ومش معنى أننا مش بنشوف المعجزات اللي بنقراها دي بتحصل بالظبط دلوقتي، يبقى نشك أن المعجزات دي حصلت، أو نشك في قدرة ربنا، أو حتى نشك في أن ربنا ممكن يعمل معانا زي ما عمل مع شعبه زمان.
تعالوا نشوف الأول ليه المعجزات دي حصلت زمان، وليه الكتاب المقدس بيذكرها؟
لو قرينا المعجزات هانلاقي ربنا كان قاصد بيها حاجة مهمة جدًا، أولاً في العهد القديم ربنا قصد من وجود المعجزات أنه يعلن عن نفسه.
يعني إيه؟
يعني زمان الناس مكانتش تعرف مين ربنا وإيه مدى قدرته، علشان يمشوا وراه أو يختاروا يطيعوه. وكانوا بيبقوا عايزين إله يشوفوه قدامهم علشان يعبدوه، لدرجة أنه ناس كتير كانت بتعمل تمثال بشكل معين ويعبدوه، أو يفتكروا الله هو الشمس فيعبدوها، وغيرهم عبدوا حيوانات، وهكذا.
ولأن الشعب زمان مكانش يقدر يشوف ربنا، فربنا كتير كان بيعمل قدامهم معجزات علشان يعرفوا هو مين ويقدر يعمل إيه ومدى قدرته، وإزاي هو أعظم بكتير من اللي ممكن يشوفوه، وأنه هو وحده الإله الحقيقي اللي خلق كل شيء في الكون.
أما في العهد الجديد، يعني بعد ما جه الرب يسوع، هانلاقي ربنا عمل معجزات أكبر بكتير من كل المعجزات الموجودة في العهد القديم، ودي برضو كان الهدف منها أنه يعلن عن نفسه، يعني يورينا هو مين ويعرفنا بنفسه.
فكانت أول معجزة في العهد الجديد، بيعلن بيها الله عن نفسه هي أنه اتجسد، يعني الله بنفسه جه وأخد جسم زينا وعاش بيننا علشان نقدر نشوفه ونعرفه. والمعجزة الأكبر أننا كلنا كنا هنروح الحجيم، لأننا مش عارفين نتخلص من الخطية، لكن الرب يسوع قدر يحل المشكلة دي واتصلب بدالنا وأخد عقابنا وقام من بين الأموات.
أما المعجزة اللي تقدر أنت تاخدها وبكل سهولة دلوقتي هي أنك لو طلبت ربنا من كل قلبك ووعدته تطيعه، هايخليك ابنه وتقدر تحبه وتكون زيه لو أطعته.
ده غير أن معجزات كتير حوالينا، لو أتأملنا كل حاجة حوالينا هانلاقيها معجزة لوحدها.
ودلوقتي بعد ماعرفنا قوة ربنا وقدرته، وشايف أن فيه حاجة مستحيلة قدامك، ماتترددش أنك تطلبها من ربنا وثق في قدرته ومحبته ليك، وحاول تسمع صوته بيكلمك ويرشدك ويرد عليك فيها.
رانيا رمسيس
