رانيا سامي
إزاي ممكن تساعد صديقك لو شعرت في يوم أنه تعبان ومضغوط؟
في خطوات بسيطة وسهلة ومش هاتكلفك كتير، لكن هاتثبت لصحبك مدى حبك له واهتمامك بيه وهاتساعده وتخفف ألمه لو هو تعبان من حاجة.
1- أول حاجة اطلب من صاحبك أنكم تخرجوا مع بعض وتتمشوا شوية. المشي له فايدة كبيرة في أنه يخرجنا من أي حالة سلبية إحنا فيها.
2- حاول تدور معاه عن السبب الحقيقي اللي بيخليه متضايق، بس من غير ما تحسسوا إنك بتضغط عليه علشان يتكلم.
3- اديله هو الفرصة الأكبر في الكلام. وبلاش تتكلم أنت طول الوقت.
4- ولو مش قادر يتكلم، اقترح عليه تعملوا مع بعض الهواية المفضلة له.
5- لو هو مضغوط بسبب امتحان، رتب معاه أولوياته علشان يقدر يستفيد من الوقت بشكل صحيح.
6- ولو في شخص مضايقه، اطلب منه إنكوا تصلوا مع بعض الأول، وحاول أنت تشجعه أنه يثق في نفسه وأنه يقدر يتغلب على أي مشاعر ناحيه الشخص ده. وساعتها هايهدا ويقدر يكلم الشخص اللي مضايقه بهدوء من غير ما يكون متعصب ويحل المشكلة.
7- لو حسيت أن الموضوع محتاج تدخل حد كبير، فكروا مع بعض في أقرب حد تتكلموا معاه وتثقوا فيه، زي بابا أو ماما أو مدرس أو مدرسة بتحبوه.
خليك فاكر أن أي حاجة هاتعملها من قلبك مع صديقك في الوقت ده أكيد هاتفرق معاه، لأن اللي من القلب هايروح للقلب علطول.
وافتكر دائمًا أن الخطوة دي هاتعلم صديقك إزاي هو كمان يتعامل معاك لما تمر بنفس الحالة بتاعته، لأن الرب يسوع علمنا أننا نعامل الناس زي ما نحب أنهم يعاملونا.
وبكده صداقتكم تدوم وتبقى أقوى.
