كتير من الناس مش بتصدق حكاية يونان وبتقول أكيد دي حكاية مش حقيقية، وبيسألوا: “إزاي ممكن يونان يعيش جوه بطن حوت، وهو فيه حوت كبير لدرجة إنه يساع إنسان؟!”.
فيه كذا سبب يخلينا نصدق أن قصة يونان قصة حقيقية.
أولاً: الرب يسوع ذكر قصة يونان في إنجيل (متى 12: 40). وطالما الرب يسوع ذكرها، يبقى دي أكيد حقيقية ومش خيال. وكمان شخصية يونان حقيقية، لأنها اتذكرت في سفر (الملوك الثاني 14: 25).
ثانيًا: الكتاب بيقولنا في (يونان 1: 17) أن ربنا جهز حوتًا كبيرًا علشان يبلع يونان. وبما أن ربنا هو اللي خلق كل الحيوانات اللي في البر واللي في البحر، يبقى مش صعب على ربنا أنه يجهز سمكة كبيرة تبلع يونان.
وبالفعل تم اكتشاف أنواع من الحيتان وأنواع من القروش كبيرة جدًا، لدرجة أنها ممكن تبلع إنسانًا كاملاً. ومن ضمن الأنواع دي فيه الحوت العظيم، والقرش الأبيض، والقرش الحوت.
أما بقى إزاي ممكن إنسان يفضل 3 أيام جوه بطن حوت!
أولاً، ممكن الأيام الثلاثة حسب اليهود متكونش 72 ساعة، لكن ممكن تكون 38 ساعة لأن الجزء من اليوم يحسب يومًا، والحاجة التانية أن عملية الهضم مش بتشتغل طالما الكائن اللي بلعه الحوت لسه حي.
وفوق كل ده، الرب يسوع قال في إنجيل متى إن دي كانت معجزة، يعني من تصميم وتنفيذ ربنا وحده، وقال إنه زي ما حصلت المعجزة دي وقدر يونان يخرج من بطن الحوت، أنا كمان هاقدر أخرج من القبر وأقوم من الموت.
