كلمة نعمة موجودة أكثر من 160 مرة في الكتاب المقدس، منها 128 مرة في العهد الجديد.
فواضح أنها كلمة مهمة جدًا في الكتاب المقدس، فمهم جدًا أننا نعرف معناها.
كلمة نعمة معناها “أننا ناخد حاجة غالية قوي إحنا مانستاهلهاش، ومانقدرش ندفع تمنها”.
تعالوا نتخيل أنك كدبت في يوم على بابا، وبابا عرف، فطلب منك أنك تفكر شوية في اللي أنت عملته. وبعد ما حسيت بغلطتك، توقعت أنك تتعاقب على كده. ولكن بدل ما تتعاقب، بابا قالك أنت فعلًا تستاهل العقاب على كذبك، لكن بدل العقاب أنا هاشتريلك كل اللي نفسك فيه. هو ده معنى النعمة! أنك في الوقت اللي كان المفروض فيه تتعاقب على أخطائك، باباك يديك نعمة. وهي كل حاجة نفسك فيها يجيبهالك.
لكن النعمة اللي بيتكلم عنها الكتاب المقدس أكبر من كده بكتييير!
فمع أننا بنغلط كل يوم وكل ساعة ونستحق من ربنا العقاب على كل غلط بنعمله، إلا أن ربنا قرر أنه يتجسد وياخد عقاب خطايانا عنا ويموت هو بدالنا. لكن مش بس إحنا ما نتعاقبش على خطايانا، لكن كمان ربنا قرر أنه يدينا نعمته، يعني الحاجة الغالية قوي اللي إحنا مانستاهلهاش ومانقدرش ندفع تمنها، وهي أننا يكون لينا نعيش في السماء ونعيش الحياة الأبدية معاه، لأن يسوع دفع التمن بدالنا.
مكانش ممكن في يوم من الأيام نقدر نروح السما ونعيش مع ربنا وإحنا خطاة وربنا قدوس، يعني مايحبش أي خطية، لكن ربنا من حبه فينا قرر أنه مش بس ما يعاقبناش، لكن كمان يدينا الحياة الأبدية، يعني نقدر نعيش معاه للأبد، وهي دي النعمة!
صدق أن يسوع حبك وأخد عقاب خطاياك، وعاهده أنك تعيش معاه هنا على الأرض ويكون أقرب واحد ليك، فيكون ليك الحياة الأبدية. يسوع هو الوحيد اللي يقدر يدخلك السما، لأنه هو اللي دفع تمن دخولك.
