أول حاجة لازم نعرفها أن أي خناقة بين بابا وماما أو كلام في البيت ماينفعش أقول لأي حد عليه.
طيب المفروض نتصرف إزاي ونقول لمين؟
كلامي مع أي حد عن المشكلة مش هايحلها، لكن بالعكس ممكن يزود المشكلة. ولازم نعرف كمان أن في حاجات كتير بينهم أنا ممكن ماافهمهاش، وأنا معنديش حكمة كفاية تساعدني في حل أي مشكلة بتواجههم، سواء كانت المشكلة دي بينهم أو مشكلة بتواجههم برا البيت.
كده المشكلة اتعقدت، أمال نعمل إيه؟
المشكلة حلها بسيط جدًا، وكتير من بساطة الحل مش بيعملوه، ومش بيصدقوا أنه هو الحل!
هو إيه؟
صلي… صلي … صلي.
يعني الصلاة هاتحل المشكلة؟
الصلاة هي مفتاح حل أي مشكلة. لأن ربنا من خلالها بيتعامل مع قلوب الناس ويقدر يغيرها، ووقتها بس هاتلاقي تصرفاتهم اتغيرت والسلام بدأ يدخل البيت، وهو ده اللي بابا وماما فعلاً هايكونوا محتاجينه، سواء كان سبب خناقهم ده مشكلة بينهم أو مشكلة بتواجههم برا البيت ومأثرة عليهم، ومخلياهم على طول متعصبين وتعبانيين.
جرب تصلي كل يوم، وتطلب من ربنا يدخل سلامه جوه البيت. ومش لازم يكون فيه مشكلة في البيت علشان نطلب من ربنا الطلب ده، لكن خليها طلبه يومية، كل يوم تطلبها من ربنا، علشان الشيطان ما يدخلش البيت. جرب وشوف نتيجة صلاتك هاتكون مؤثرة أزاي وبتغير إزاي.
أنا صغير ومش معقول ربنا يسمع مني، وتكون صلاتي سبب في تغييرهم!
لأ. لأنك صغير، ربنا هايسمع منك أكتر. افتكر لما يسوع كان بيقول: “دعوا الأولاد يأتون إليَّ ولا تمنعوهم، لأن لمثل هؤلاء ملكوت السموات”، كان يقصد حاجات كتير، منها أن رغم سنك الصغير لكن عندك قلب كبير ومكانة كبيرة عند ربنا، ولأنك بتصلي من قلبك ربنا هايسمع في الحال.
أي كلمة حقيقية من قلبنا، وأي طلبة صادقة من قلبنا بتوصل لربنا أسرع وأقوى من أي كلام كتير ممكن نقوله وإحنا مش حاسينه.
رانيا رمسيس
